[rtl]1_ لـ... مصر[/rtl]
[rtl]ويا مصر.. وان خيّرونى.. ما اسكن الَّاكى[/rtl]
[rtl]ولاجْل تْتبسِّـمى.. يا ما بابات.. باكى[/rtl]
[rtl]تسقينى كاس المرار.. وبرضْـه باهواكى[/rtl]
[rtl]بلدى..!!.. ومالى الّا إنتى.. ولو ظلمتينى[/rtl]
[rtl]مقبولة منِّك جراح قلبى ودموع عينى..[/rtl]
[rtl]الجرح يشْـفَى.. إذا بإيدِك لمستينى[/rtl]
[rtl]كُلِّك حلاوة.. وكلمة «مصر».. أحلاكى!![/rtl]
[rtl]2_ ياللِّى تِصدَّقها[/rtl]
[rtl]قالَّك ياريت الزَّمن ماعشِّـمَك يومها[/rtl]
[rtl]ولا قالَّك اسعى وروح واهى قومة وتقومها[/rtl]
[rtl]إيه خدت مِ الدنيا إلا لؤمها.. ولُومْها؟![/rtl]
[rtl]ياللِّى تِصدَّقها.. ادفع حق تصديقك[/rtl]
[rtl]أحزانك المُرَّة ماشى معاها من ضِـيقك[/rtl]
[rtl]إنت تِلَمْلِمْها.. هية غاوية تفريقك[/rtl]
[rtl]إنت تنوَّرْها.. صاحى اللى يضلِّمْها[/rtl]
[rtl]وانت الأصيل اللى مش بِتعوم على عُومْها[/rtl]
[rtl]كترت عليك الهموم وِمْنَشِّـفَة ريقك[/rtl]
[rtl]تابع طريقك.. تطيقك وَالَّا ما تطيقك..[/rtl]
[rtl]هل شُـفت فيه شمس وِحْلتْ مرَّة فى غيومها؟![/rtl]
[rtl]3_ فى الحلم[/rtl]
[rtl]فى الحلم.. جانى الوطن.. قاللّى: «حتعمل كيف[/rtl]
[rtl]وانت بليد.. والزمن ماضى وزىّ السيف؟[/rtl]
[rtl]عُمْر الزمن ما أْتَمَر.. ولا مشى ع الكيف»[/rtl]
[rtl]أنا قلت له: «يا وطن.. أمرى ماهوش بِيِدى[/rtl]
[rtl]وبين ميعاد وميعاد.. خانتنى مواعيدى[/rtl]
[rtl]لا طِلِع ميعادى.. ولا عيدى صبح عيدى[/rtl]
[rtl]وكام ماغدّارة يادِنيا.. وبتكيدى[/rtl]
[rtl]أنا كنت سِيد الزمن وادى الزمن سيدى[/rtl]
[rtl]عملت ثورة ورا ثورة.. وادينى ضيف[/rtl]
[rtl]كشف غطايا الهوا.. والحلم كان تخريف[/rtl]
[rtl]أحلامى رجعتْ لى تسكن فى تجاعيدى[/rtl]
[rtl]لا هانيلى لقمةْ طعام.. ولا شاى يردّ الكيف!!»[/rtl]
[rtl]4_ حارس السجن[/rtl]
[rtl]يا حارس السجن يا قارص على اقْفَالُه[/rtl]
[rtl]ياللّى حبست الولد.. ماسألتهوش: «مالُه»؟![/rtl]
[rtl]لا تكون فاكرنى حاوصِّـى واقول: «على مهلك»..[/rtl]
[rtl]أو .. «خِفّ إيدك عليه خوف لا الولد يهلك[/rtl]
[rtl]الواد دا حِتِّةْ بطل.. مسجون وعارف ليه..[/rtl]
[rtl]وراضى عن سجنُه يا سجَّان.. وساعى إليه[/rtl]
[rtl]إنت اللى غلبان.. ومحتاج من يوصِّـى عليه[/rtl]
[rtl]إنت اللّى فى الأصل كان السجن يستاهلك[/rtl]
[rtl]وهوّه زنزانته أمُّه... والليمان خاُله»!![/rtl]
[rtl]5_ سايق الهِجْن..!![/rtl]
[rtl]وانت غريم الزمن.. حالف ما تتصالح[/rtl]
[rtl]الضحكة عايمة تَمَلِّى فْ دمْعَك المالح[/rtl]
[rtl]عمرك.. وبِتْعِيشُـه مُدَّة.. مودَّعه مُدَّة[/rtl]
[rtl]أحلى ما فى الريح.. بِتديك فُرصة تِتْحَدَّى[/rtl]
[rtl]ويوماتى تِفْـطَر مع موتك.. وتِتْغَدَّى[/rtl]
[rtl]والأصل فى الشِّـدَّة.. تطلع مِنَّها فالح!![/rtl]
[rtl]■ ■[/rtl]
[rtl]وانا سايق الهِجْن.. ناقتى مش مطاوعانى[/rtl]
[rtl]تُبصِّ لى بغربة زىّ ما اكون واحد تانى[/rtl]
[rtl]ولا مُوَنِّسْها حِسِّـى.. زى ماكُنَّا..[/rtl]
[rtl]عِشْـرة طويلة انطوت.. وكإننا هُنَّا[/rtl]
[rtl]مين اللّى زرع الَجفا والفُرقة.. مابينَّا..؟[/rtl]
[rtl]ولا عاد حُدَايا يخليها.. مِهاوْدانى!![/rtl]
[rtl]6_ تاجر الحُبّ..!![/rtl]
[rtl]ويا تاجر الحُبّ.. كَيِّل لِى تلات قناطير..[/rtl]
[rtl]يتفرقوا ع الحبايب.. من كبير.. لصغير[/rtl]
[rtl]أرُشّ رشَّـة هِنا ورشَّة هِناك.. وأطير[/rtl]
[rtl]ودا عِشْق لا يلْزَمُه تزويق ولا تحضير[/rtl]
[rtl]سوق المودَّة جَبَرْ.. وِاتفرّقوا العُشّاق[/rtl]
[rtl]واحد يشُـوفُه صباح.. واحد يشوفه مساء[/rtl]
[rtl]بس الوطن أَلمعى.. وبيفرز الأسماء[/rtl]
[rtl]وانا.. فى حب الوطن.. ساذج ماليش آراء[/rtl]
[rtl]وهافرَّق الحُب حتى ع اللى مِشْ مشتاق[/rtl]
[rtl]وبكره.. ربك لوحدُه يسَدِّدِ الفواتير..!![/rtl]
[rtl]7_ تاجر الصبر[/rtl]
[rtl]يا تاجر الصبر.. ماتْخِلِّش فى ميزانَك..[/rtl]
[rtl]مِن حُوجْتى للصبر ساكن جنْب دُكَّانَك[/rtl]
[rtl]قلبى يمامة تِهجّ تهجّ.. وتجينى[/rtl]
[rtl]لا يهمها مِنْ أنينى أوْ دموع عينى[/rtl]
[rtl]فاعمل لّى تحويجة.. من صبرك وإحسانك!![/rtl]
[rtl]■ ■[/rtl]
[rtl]يا تاجر الصبر ما انت شايفنى مش صابر[/rtl]
[rtl]الكسر بِيدِى.. أنا المكسور وانا الجابِر[/rtl]
[rtl]الحلم خدنى صحيت وأخدنى من تانى[/rtl]
[rtl]كإنى لا نمت ولا فيه حدّ.. صحَّانى[/rtl]
[rtl]الصبر مايفوتْش على اللى دمعهم حاضر!![/rtl]
[rtl]■ ■[/rtl]
[rtl]سامع دموعهم سَمَع.. دمع الفقير ليه صوت[/rtl]
[rtl]دمْعَه بطول السنين. من الميلاد.. للموت[/rtl]
[rtl]الفقرا.. ربك عشانهم بسّ.. خلَق الصبر[/rtl]
[rtl]والصبر زاد الفقير.. من وَلْدِتُه.. للقبر[/rtl]
[rtl]ما هو لولا صبر الفقير.. إزاى حياتُه تفوت؟![/rtl]
[rtl]■ ■[/rtl]
[rtl]يا تاجر الصبر.. أُمَّه بتنتِظر ع الباب[/rtl]
[rtl]كوِّم وكوِّم.. ولا تسألش ع الأسباب[/rtl]
[rtl]الصبر لوْجِهْ بفايدة نبوسوا أجفانك[/rtl]
[rtl]ونسوق محّبتنا ودُعانا.. لِدُكَّانك[/rtl]
[rtl]يا تاجر الصبر إطلع مَره مش كداب!![/rtl]
[rtl]■ ■[/rtl]
[rtl]صابر على الجرح لا باعانى عطش ولا جوع[/rtl]
[rtl]وإنْ ما شافتنى عينيك.. صوت الدموع مسموع[/rtl]
[rtl]مال النخيل ع المصاطب خُد مكان فى الضِّـل[/rtl]
[rtl]علمنى أصبر على الغريمين عدو أو خِلّ[/rtl]
[rtl]واذا ما شوفناش نتيجة.. نغير الموضوع..!![/rtl]
[rtl]8_ عشان الحبايب[/rtl]
[rtl]فرَّعْت يا شوق عيدانك من عيون ناِيِيى[/rtl]
[rtl]وانا باملك إيه غير مودَّة وحِزن وِنَوايِيى[/rtl]
[rtl]والقلب ساقيةْ بُكا.. فاضى.. وملاَّييى[/rtl]
[rtl]وعامل ايه يا غزال؟![/rtl]
[rtl]■■■■[/rtl]
[rtl]صياد.. لفعْت السهام والقوس على كتفى[/rtl]
[rtl]شارد لقيتك.. عينيك صيّاد.. وبرَّيَة[/rtl]
[rtl]رميتنى.. سهم العيون جاب قلبى من كِتفى[/rtl]
[rtl]واتارى للِّيلِ قوس.. وسهام.. وكراهيَّة[/rtl]
[rtl]صابنى وصابك!![/rtl]
[rtl]■■■■[/rtl]
[rtl]والليلِ شرّانى.. وقّع منى بُستانى[/rtl]
[rtl]وقطّع الخيط وشحَتْر تحتى مُرجانى[/rtl]
[rtl]نُصّين بقيت يا قمر مين يُلْضُمك تانى[/rtl]
[rtl]ومين يِرَوَّقْ عَكَار الكلمه فى لسانى[/rtl]
[rtl]ويا هلترى تعود تجود بالودّ يا زمانى[/rtl]
[rtl]واقعد مع الوِلْف اكمّل لقمتى وشاييى؟!![/rtl]
[rtl]9_ بانام براحتى[/rtl]
[rtl]الحمد للّه خلقنى فقير رقيق الحال...[/rtl]
[rtl]لاطْلِعت تاجر ولاطلعتِش رجُل أعمال[/rtl]
[rtl]لا مْسَاوَمَة.. ولا غش[/rtl]
[rtl]ولا باشوف الدنيا من خُرْم قرش[/rtl]
[rtl]ولا باشيل الميَّه فى الغربال!![/rtl]
[rtl]■ ■[/rtl]
[rtl]والحمد للّه.. خلقنى حِتَّة من ناسى[/rtl]
[rtl]وبانام براحتى.. لإنّ فراشى بمقاسى[/rtl]
[rtl]مكفىِّ بيتى حلال[/rtl]
[rtl]وكلّ من شافنى يقول: «يا خال»[/rtl]
[rtl]عابر سبيل.. ورأيى من راسى!![/rtl]
[rtl]■ ■[/rtl]
[rtl]سنين تجرجر سنين عدِّت وانا منّى[/rtl]
[rtl]وعمرى ماخُـنت ولا حتى اللّى خاينينى[/rtl]
[rtl]وأسرة متخنَدقَة متشالة فى النِنِّى[/rtl]
[rtl]وبيت.. جيرانى تزيد فى محبِّتْه عنى!![/rtl]
[rtl]■ ■[/rtl]
[rtl]والحمد لله.. وهبنى قلم مابيخونِّيش[/rtl]
[rtl]عُمره ما يمدح ومستنِّى طلوع العيش[/rtl]
[rtl]قلم واخدها جدّ[/rtl]
[rtl]ساعة ماتشتد الهموم.. يشتدّ[/rtl]
[rtl]وساعة الضّنْك بينام ع البُروش والخيش!![/rtl]
[rtl]■ ■[/rtl]
[rtl]وعملت قُبة جميلة... وتحتَها مَرْقَد[/rtl]
[rtl]فى آخر الرحلة هافرش فيه واتمدَّدْ[/rtl]
[rtl]لِنُوم بلا صحوة[/rtl]
[rtl]ماحاخدش فى إيد الزمن غَلْوة[/rtl]
[rtl]وكل ألوان هتهرب.. ماعَدَا الأسْوَدْ..!![/rtl]
[rtl]10_ صوتى[/rtl]
[rtl]أنا باشكر اللى خلق لى الصوت وأوصانى[/rtl]
[rtl]أقول كلام حُرّ.. مايقبلْش لون تانى..[/rtl]
[rtl]مااسكتش ع الضيم واهشّ الغيم بقولة آه..[/rtl]
[rtl]وإن سَـرَقُوا صوتى بيْنسُـوا ياخدوا قولة آه..[/rtl]
[rtl]فى الفرْح.. فى الجرح إيه حيلتى الّا قولة آه[/rtl]
[rtl]يحميك يا ولدى.. وكنت اسكت وتتكلِّم[/rtl]
[rtl]يحميك يا ولدى واكون مجروح.. وتتألِّم[/rtl]
[rtl]ياما حَرَسْت النهار.. آدى النهار.. ضَلِّم[/rtl]
[rtl]وإن شفت جرح الوطن جوَّه الفؤاد عَلِّم[/rtl]
[rtl]تقول كلام.. يا سلام.. يحيينى من تانى..!![/rtl]
[rtl]ويا مصر.. وان خيّرونى.. ما اسكن الَّاكى[/rtl]
[rtl]ولاجْل تْتبسِّـمى.. يا ما بابات.. باكى[/rtl]
[rtl]تسقينى كاس المرار.. وبرضْـه باهواكى[/rtl]
[rtl]بلدى..!!.. ومالى الّا إنتى.. ولو ظلمتينى[/rtl]
[rtl]مقبولة منِّك جراح قلبى ودموع عينى..[/rtl]
[rtl]الجرح يشْـفَى.. إذا بإيدِك لمستينى[/rtl]
[rtl]كُلِّك حلاوة.. وكلمة «مصر».. أحلاكى!![/rtl]
[rtl]2_ ياللِّى تِصدَّقها[/rtl]
[rtl]قالَّك ياريت الزَّمن ماعشِّـمَك يومها[/rtl]
[rtl]ولا قالَّك اسعى وروح واهى قومة وتقومها[/rtl]
[rtl]إيه خدت مِ الدنيا إلا لؤمها.. ولُومْها؟![/rtl]
[rtl]ياللِّى تِصدَّقها.. ادفع حق تصديقك[/rtl]
[rtl]أحزانك المُرَّة ماشى معاها من ضِـيقك[/rtl]
[rtl]إنت تِلَمْلِمْها.. هية غاوية تفريقك[/rtl]
[rtl]إنت تنوَّرْها.. صاحى اللى يضلِّمْها[/rtl]
[rtl]وانت الأصيل اللى مش بِتعوم على عُومْها[/rtl]
[rtl]كترت عليك الهموم وِمْنَشِّـفَة ريقك[/rtl]
[rtl]تابع طريقك.. تطيقك وَالَّا ما تطيقك..[/rtl]
[rtl]هل شُـفت فيه شمس وِحْلتْ مرَّة فى غيومها؟![/rtl]
[rtl]3_ فى الحلم[/rtl]
[rtl]فى الحلم.. جانى الوطن.. قاللّى: «حتعمل كيف[/rtl]
[rtl]وانت بليد.. والزمن ماضى وزىّ السيف؟[/rtl]
[rtl]عُمْر الزمن ما أْتَمَر.. ولا مشى ع الكيف»[/rtl]
[rtl]أنا قلت له: «يا وطن.. أمرى ماهوش بِيِدى[/rtl]
[rtl]وبين ميعاد وميعاد.. خانتنى مواعيدى[/rtl]
[rtl]لا طِلِع ميعادى.. ولا عيدى صبح عيدى[/rtl]
[rtl]وكام ماغدّارة يادِنيا.. وبتكيدى[/rtl]
[rtl]أنا كنت سِيد الزمن وادى الزمن سيدى[/rtl]
[rtl]عملت ثورة ورا ثورة.. وادينى ضيف[/rtl]
[rtl]كشف غطايا الهوا.. والحلم كان تخريف[/rtl]
[rtl]أحلامى رجعتْ لى تسكن فى تجاعيدى[/rtl]
[rtl]لا هانيلى لقمةْ طعام.. ولا شاى يردّ الكيف!!»[/rtl]
[rtl]4_ حارس السجن[/rtl]
[rtl]يا حارس السجن يا قارص على اقْفَالُه[/rtl]
[rtl]ياللّى حبست الولد.. ماسألتهوش: «مالُه»؟![/rtl]
[rtl]لا تكون فاكرنى حاوصِّـى واقول: «على مهلك»..[/rtl]
[rtl]أو .. «خِفّ إيدك عليه خوف لا الولد يهلك[/rtl]
[rtl]الواد دا حِتِّةْ بطل.. مسجون وعارف ليه..[/rtl]
[rtl]وراضى عن سجنُه يا سجَّان.. وساعى إليه[/rtl]
[rtl]إنت اللى غلبان.. ومحتاج من يوصِّـى عليه[/rtl]
[rtl]إنت اللّى فى الأصل كان السجن يستاهلك[/rtl]
[rtl]وهوّه زنزانته أمُّه... والليمان خاُله»!![/rtl]
[rtl]5_ سايق الهِجْن..!![/rtl]
[rtl]وانت غريم الزمن.. حالف ما تتصالح[/rtl]
[rtl]الضحكة عايمة تَمَلِّى فْ دمْعَك المالح[/rtl]
[rtl]عمرك.. وبِتْعِيشُـه مُدَّة.. مودَّعه مُدَّة[/rtl]
[rtl]أحلى ما فى الريح.. بِتديك فُرصة تِتْحَدَّى[/rtl]
[rtl]ويوماتى تِفْـطَر مع موتك.. وتِتْغَدَّى[/rtl]
[rtl]والأصل فى الشِّـدَّة.. تطلع مِنَّها فالح!![/rtl]
[rtl]■ ■[/rtl]
[rtl]وانا سايق الهِجْن.. ناقتى مش مطاوعانى[/rtl]
[rtl]تُبصِّ لى بغربة زىّ ما اكون واحد تانى[/rtl]
[rtl]ولا مُوَنِّسْها حِسِّـى.. زى ماكُنَّا..[/rtl]
[rtl]عِشْـرة طويلة انطوت.. وكإننا هُنَّا[/rtl]
[rtl]مين اللّى زرع الَجفا والفُرقة.. مابينَّا..؟[/rtl]
[rtl]ولا عاد حُدَايا يخليها.. مِهاوْدانى!![/rtl]
[rtl]6_ تاجر الحُبّ..!![/rtl]
[rtl]ويا تاجر الحُبّ.. كَيِّل لِى تلات قناطير..[/rtl]
[rtl]يتفرقوا ع الحبايب.. من كبير.. لصغير[/rtl]
[rtl]أرُشّ رشَّـة هِنا ورشَّة هِناك.. وأطير[/rtl]
[rtl]ودا عِشْق لا يلْزَمُه تزويق ولا تحضير[/rtl]
[rtl]سوق المودَّة جَبَرْ.. وِاتفرّقوا العُشّاق[/rtl]
[rtl]واحد يشُـوفُه صباح.. واحد يشوفه مساء[/rtl]
[rtl]بس الوطن أَلمعى.. وبيفرز الأسماء[/rtl]
[rtl]وانا.. فى حب الوطن.. ساذج ماليش آراء[/rtl]
[rtl]وهافرَّق الحُب حتى ع اللى مِشْ مشتاق[/rtl]
[rtl]وبكره.. ربك لوحدُه يسَدِّدِ الفواتير..!![/rtl]
[rtl]7_ تاجر الصبر[/rtl]
[rtl]يا تاجر الصبر.. ماتْخِلِّش فى ميزانَك..[/rtl]
[rtl]مِن حُوجْتى للصبر ساكن جنْب دُكَّانَك[/rtl]
[rtl]قلبى يمامة تِهجّ تهجّ.. وتجينى[/rtl]
[rtl]لا يهمها مِنْ أنينى أوْ دموع عينى[/rtl]
[rtl]فاعمل لّى تحويجة.. من صبرك وإحسانك!![/rtl]
[rtl]■ ■[/rtl]
[rtl]يا تاجر الصبر ما انت شايفنى مش صابر[/rtl]
[rtl]الكسر بِيدِى.. أنا المكسور وانا الجابِر[/rtl]
[rtl]الحلم خدنى صحيت وأخدنى من تانى[/rtl]
[rtl]كإنى لا نمت ولا فيه حدّ.. صحَّانى[/rtl]
[rtl]الصبر مايفوتْش على اللى دمعهم حاضر!![/rtl]
[rtl]■ ■[/rtl]
[rtl]سامع دموعهم سَمَع.. دمع الفقير ليه صوت[/rtl]
[rtl]دمْعَه بطول السنين. من الميلاد.. للموت[/rtl]
[rtl]الفقرا.. ربك عشانهم بسّ.. خلَق الصبر[/rtl]
[rtl]والصبر زاد الفقير.. من وَلْدِتُه.. للقبر[/rtl]
[rtl]ما هو لولا صبر الفقير.. إزاى حياتُه تفوت؟![/rtl]
[rtl]■ ■[/rtl]
[rtl]يا تاجر الصبر.. أُمَّه بتنتِظر ع الباب[/rtl]
[rtl]كوِّم وكوِّم.. ولا تسألش ع الأسباب[/rtl]
[rtl]الصبر لوْجِهْ بفايدة نبوسوا أجفانك[/rtl]
[rtl]ونسوق محّبتنا ودُعانا.. لِدُكَّانك[/rtl]
[rtl]يا تاجر الصبر إطلع مَره مش كداب!![/rtl]
[rtl]■ ■[/rtl]
[rtl]صابر على الجرح لا باعانى عطش ولا جوع[/rtl]
[rtl]وإنْ ما شافتنى عينيك.. صوت الدموع مسموع[/rtl]
[rtl]مال النخيل ع المصاطب خُد مكان فى الضِّـل[/rtl]
[rtl]علمنى أصبر على الغريمين عدو أو خِلّ[/rtl]
[rtl]واذا ما شوفناش نتيجة.. نغير الموضوع..!![/rtl]
[rtl]8_ عشان الحبايب[/rtl]
[rtl]فرَّعْت يا شوق عيدانك من عيون ناِيِيى[/rtl]
[rtl]وانا باملك إيه غير مودَّة وحِزن وِنَوايِيى[/rtl]
[rtl]والقلب ساقيةْ بُكا.. فاضى.. وملاَّييى[/rtl]
[rtl]وعامل ايه يا غزال؟![/rtl]
[rtl]■■■■[/rtl]
[rtl]صياد.. لفعْت السهام والقوس على كتفى[/rtl]
[rtl]شارد لقيتك.. عينيك صيّاد.. وبرَّيَة[/rtl]
[rtl]رميتنى.. سهم العيون جاب قلبى من كِتفى[/rtl]
[rtl]واتارى للِّيلِ قوس.. وسهام.. وكراهيَّة[/rtl]
[rtl]صابنى وصابك!![/rtl]
[rtl]■■■■[/rtl]
[rtl]والليلِ شرّانى.. وقّع منى بُستانى[/rtl]
[rtl]وقطّع الخيط وشحَتْر تحتى مُرجانى[/rtl]
[rtl]نُصّين بقيت يا قمر مين يُلْضُمك تانى[/rtl]
[rtl]ومين يِرَوَّقْ عَكَار الكلمه فى لسانى[/rtl]
[rtl]ويا هلترى تعود تجود بالودّ يا زمانى[/rtl]
[rtl]واقعد مع الوِلْف اكمّل لقمتى وشاييى؟!![/rtl]
[rtl]9_ بانام براحتى[/rtl]
[rtl]الحمد للّه خلقنى فقير رقيق الحال...[/rtl]
[rtl]لاطْلِعت تاجر ولاطلعتِش رجُل أعمال[/rtl]
[rtl]لا مْسَاوَمَة.. ولا غش[/rtl]
[rtl]ولا باشوف الدنيا من خُرْم قرش[/rtl]
[rtl]ولا باشيل الميَّه فى الغربال!![/rtl]
[rtl]■ ■[/rtl]
[rtl]والحمد للّه.. خلقنى حِتَّة من ناسى[/rtl]
[rtl]وبانام براحتى.. لإنّ فراشى بمقاسى[/rtl]
[rtl]مكفىِّ بيتى حلال[/rtl]
[rtl]وكلّ من شافنى يقول: «يا خال»[/rtl]
[rtl]عابر سبيل.. ورأيى من راسى!![/rtl]
[rtl]■ ■[/rtl]
[rtl]سنين تجرجر سنين عدِّت وانا منّى[/rtl]
[rtl]وعمرى ماخُـنت ولا حتى اللّى خاينينى[/rtl]
[rtl]وأسرة متخنَدقَة متشالة فى النِنِّى[/rtl]
[rtl]وبيت.. جيرانى تزيد فى محبِّتْه عنى!![/rtl]
[rtl]■ ■[/rtl]
[rtl]والحمد لله.. وهبنى قلم مابيخونِّيش[/rtl]
[rtl]عُمره ما يمدح ومستنِّى طلوع العيش[/rtl]
[rtl]قلم واخدها جدّ[/rtl]
[rtl]ساعة ماتشتد الهموم.. يشتدّ[/rtl]
[rtl]وساعة الضّنْك بينام ع البُروش والخيش!![/rtl]
[rtl]■ ■[/rtl]
[rtl]وعملت قُبة جميلة... وتحتَها مَرْقَد[/rtl]
[rtl]فى آخر الرحلة هافرش فيه واتمدَّدْ[/rtl]
[rtl]لِنُوم بلا صحوة[/rtl]
[rtl]ماحاخدش فى إيد الزمن غَلْوة[/rtl]
[rtl]وكل ألوان هتهرب.. ماعَدَا الأسْوَدْ..!![/rtl]
[rtl]10_ صوتى[/rtl]
[rtl]أنا باشكر اللى خلق لى الصوت وأوصانى[/rtl]
[rtl]أقول كلام حُرّ.. مايقبلْش لون تانى..[/rtl]
[rtl]مااسكتش ع الضيم واهشّ الغيم بقولة آه..[/rtl]
[rtl]وإن سَـرَقُوا صوتى بيْنسُـوا ياخدوا قولة آه..[/rtl]
[rtl]فى الفرْح.. فى الجرح إيه حيلتى الّا قولة آه[/rtl]
[rtl]يحميك يا ولدى.. وكنت اسكت وتتكلِّم[/rtl]
[rtl]يحميك يا ولدى واكون مجروح.. وتتألِّم[/rtl]
[rtl]ياما حَرَسْت النهار.. آدى النهار.. ضَلِّم[/rtl]
[rtl]وإن شفت جرح الوطن جوَّه الفؤاد عَلِّم[/rtl]
[rtl]تقول كلام.. يا سلام.. يحيينى من تانى..!![/rtl]