"ابن البلد شكوكو" يستعيد الذكريات: أول أجرة أخدتها كانت "قرشين صاغ" من الغنا في الموالد

شكوكو
"جدع ابن بلد"، عشق الجلابية البلدي، ورقص بالعصا، غنى في الأفراح الشعبية والموالد، وكان صنايعي كسيب، فورث مهنة النجارة عن أبيه، ولكنه ترك يومية "ربع جنيه"، من أجل عيون الفن، الذي تقاضى أول أجر منه قرشين صاغ، فكان التمثيل هوايته، والمونولوج صنعته.

في أول مايو والعالم يحتفل بعيد العمال سنة 1912، وقبل اندلاع نيران الحرب العالمية الأولى في العالم كله، ولد محمود شكوكو في الدرب الأحمر بالقاهرة، هكذا كانت مقدمة الفنان سمير صبري، للحوار التليفزيوني النادر في أوائل الثمانينيات، مع "صاحب ورد عليك"، الذي لم يخلُ من الضحك والفكاهة.

شكوكو: أول مرة ألبس الجلابية كان "في ورد عليك".. والعصايا كانت في مونولوج عن فتوة

ففي حضرة محمود شكوكو نستعيد الذكريات:-

سمير صبري: إنما شكوكو ده اسمك الحقيقي ولا؟
شكوكو ساخرًا: لا فعل مضارع هههه، لا اسم أبويا كدة، اسم أبويا إبراهيم شكوكو، وأخويا اسمه محمد شكوكو، وأختي اسممها شكوكاية، وأنا شكوكو، يعني كلنا مشكوكين والحمد لله.
سمير صبري: لما اشتغلت في الفن يا أستاذ محمود محدش قلك غيّر اسم شكوكو؟
شكوكو: لا، لكن مرة واحدة، كنت مركب سنة دهب، قابلني الله يرحمه حسين المليجي اللي خدني عنده في السمرح، وقال لي انت عال العال، جسمك وشكلك وصوتك وكل حاجة، بس تخلع السنة، فخلعت السنة ومرضتش أخلع اسمي.
سمير صبري: يعني اللي اكتشفك حسين المليجي؟
شكوكو: لا مش هو اللي اكتشفني، محمد بيه فتحي، اللي كان مدير الإذاعة وقتها.
سمير صبري: كروان الإذاعة صح.
شكوكو: أيوة.
سمير صبري: لكن هو سمعك فين؟
شكوكو: سمعني في عيد ميلاد سيد مصطفى بتاع الكرة.
سمير صبري: وانت كنت بتشتغل وقتها؟
شكوكو: أيوة كنت بشتغل وقتها في صنعتي نجار مع أبويا، وكمان كنت بروح الأفراح وبغني هواية، ولحد سنة 1940 مكنتش محترف، ولما احترفت كان عندي ورشة سبتها لأخويا.
سمير صبري: أول أجر أخدته إيه؟
شكوكو: قرشين صاغ، كنت شغال عند واحدة اسمها فاطمة الكسارة في الموالد، كنت أروح لها الجيزة، أركب بـ12 مليم رايح و12 مليم جاي، وتديني قرشين صاغ.
سمير صبري: وكانوا القرشين صاغ وقتها حاجة كبيرة؟
شكوكو: أيوة، بس أنا كنت بكسب من صنعتي النجارة، بكسب أوي يعني، كنت ساعتها باخد 25 قرش في اليوم.
سمير صبري: لما كنت في محل النجارة بتاعكم كنت بتغني لمين؟
شكوكو: كنت بغني لأم كلثوم، ومحمد عبدالوهاب، ومحمد العربي، والحاجة زينب، كل ما أسمع أغنية كنت أرددها.
سمير صبري: وكنت بتغني إيه لمحمد عبد الوهاب؟
شكوكو: "يا بابور قولي رايح على فين"، و"كلما حب القمر"، والحاجات القديمة اللي كان بيقولها.
سمير صبري: انت اشتغلت مع علي الكسار على المسرح؟
شكوكو: اشتغلت معاه في المونولوجات ومثلت معاه.
سمير صبري: ويا ترى يا أستاذ محمود كنت بتروح الأفراح بالجلابية؟
شكوكو: كنت بلبس بدلة زرقا، أنا الجلبية لما لبستها كان على مسرح روض الفرج، وكان أحمد المسيري عملي ورد عليك فل عليك.
بعدها يغني شكوكو مقطع من أغنية "ورد عليك فل عليك".
سمير صبري: إمتى شوفت إسماعيل يس أول مرة؟
شكوكو: هو اللي جه شافني في فرح، كان معزوم في الفرح وجه وشافني، أما أنا فكنت بغني من قبل إسماعيل ياسين.
سمير صبري: مين كان أشهر مونولوجست في الوقت ده؟
شكوكو: سيد سليمان ومحمد البربري وزكي الور وعبدالعزيز أحمد.
صبري: أول مرة مسكت العصايا في الغنا كانت إمتى؟
شكوكو: ده كان في واحد اسمه مصطفى الطوربيد، عملي مونولوج اسمه "الواد يهبني واللي خلقك"، وصاحب الشخصية ده كان فتوة، وكان لازم أمسك العصايا.
صبري: أول فيلم عملته كان اسمه إيه؟
شكوكو: فيلم "أحب البلدي"، إخراج حسين فوزي، وبطولة أنور وجدي وتحية كاريوكا، قلت فيه "الحارس الله على النبي صلي"، و"ورد عليك"، وبعدين حسين فوزي عملي فيلم "الصبر الطيب" أنا وإبراهيم حمودة وتحيا كاريوكا.
سمير صبري: أول فيلم بطولة؟
شكوكة: عملت فيلم "البني آدم" مع سامية جمال، وبعدين مشيت، وده بقا ياخدني وده ياخدني، عملت أفلام كتيرة، وبعدين عملت ثنائي مع إسماعيل يس، ونجح زي "ليلة العيد".