الارهابى عبد المنعم ابو الفتوح

الارهابى عبد المنعم ابو الفتوح





النص التالي (نقلا عن المخرج والسيناريست محمد دياب)
الصوره المرفقة إنتشرت فجأه وتحتها تعليقات إن د. عبد المنعم ابو الفتوح منتمي لتنظيم طالبان الأرهابي، وإنه حارب في أفغانستان.

خدوا بالكوا مبدئياً من كلمه فجأه دي عشان ده وقت حرب الشائعات.

ورغم أني عارف الرد علي الصوره بس قررت إني مدافعش من غير متأكد بنفسي وكلمت أبو الفتوح بس بعد ما قالي قصه الصوره قررت إني مكتفيش يمكن الراجل بيبرر وخلاص فجبت نمره د. شريف عمر الدكتور اللي متصور معاه وكلمته

شريف عمر لم يكن إخوان، بل كان رجل حالم يظن إن أصلاح الحزب الوطني ممكن يبقي من الداخل ولاحقاً كان عضو مجلس الشعب ٣ دورات عن الحزب الوطني!!

يعني شهادته مش مجروحه ووجوده في الصوره لوحده دليل إن الإتهامات تخريف

ودي شهادته:
بدايه القصه من قرار الجمعيه العموميه لأطباء مصر اللي تمثل ٤٠٠٠٠ طبيب بتشكيل لجنه إغاثه مصريه للمنكوبين في أفغانستان وبتكليف من نقيب الأطباء ممدوح جبر تم تكليفي وأبو الفتوح بالسفر لأفغانستان

إولاً توقيت الصوره دي هو ١٩٨٥ أيام حرب أفغانستان مع روسيا، أيام المقاومه ما كانت شرف وحتي الدول الغربيه كانت بتساند الأفغان كمقاوميين. ورغم كده معظم شغلنا كان مع النازحيين اللي سابوا بيوتهم بسبب الحرب.

حتي اللبس الأفغاني لابسينه بنائاً علي نصيحه السفاره المصريه عشان محدش يفتكرنا أجانب وروس بالذات لأنهم كانوا بيروحوا أماكن قبليه زي البدو عندنا والناس وسط الحرب بيقلقوا من الأجانب.

المهمه دي كانت إنسانيه، وحياتنا إتعرضت للخطر أكتر من مره وأؤكد إن دي صوره لازم ابو الفتوح يفخر بيها!!!!!

ورغم إن التبرير ملوش لازمه أصلاً بس طالبان ظهرت بعدها بتسع سنين سنه ١٩٩٤ ... والإرهاب مظهرش غير في التسعينيات وبرضه أبو الفتوح والإخوان كانوا بيدينوه

الأهرام نفسها في عدد ٢٨-٥-١٩٨٥ كانت محتفله بجهود الإغاثه وشايفاها عمل بطولي وفوق نسخه منها بعتهالي د. شريف

ده وقت الإشاعات في أي إنتخابات في الدنيا، مش مهم الإشاعه يكون ليها أي أساس من الصحه ومش مهم تتكذب بعد كده وتطلع وهم. إهم حاجه الكذبه تنتشر وقت الإنتخابات فتأثر علي الناس

أبو الفتوح طالع عليه كومبو إشاعات. زي موضوع الجهاد وإنه أمير المعرفش أيه.

أبو الفتوح أسس مع زملاء أسره الجامعه إسمها الجماعه الإسلاميه، ودليل سلميتها دخولها إنتخابات الجامعه وإنه هو كسب أمين إتحاد الطلاب.

(قاعده: اللي بيتحول للعنف بيبقي رافض يلعب سياسه)

بعد كده هو و زمايله معظمهم دخلوا الإخوان، واللي رفض يخش في لعبه السياسه ورفض يفضل سلمي كان معظمه من فرع الأسره في إسيوط اللي إنفصلوا وكونوا (تنظيم الجهاد) اللي تحول للعنف. والإخوان وإبو الفتوح أدانوهم تماماً.

أبو الفتوح لما قال لعمرو موسي كلامك غير دقيق عن موضوع الجماعه الإسلاميه، كان قصده كلامك غير دقيق لأنك آخده خارج سياقه

كوميدي إن أبو الفتوح تبقي الإشاعات عليه إنه متطرف، مع إن كل خلافاته وصدامه مع الإخوان كان إتهامهم ليه إنه متحرر حبيتين!